ایکی ایل اونجه تیر آییندا ، آذربایجاندا چوخ ساییدا اینسانلارین بابک قالاسی یولوندا توتوقلانیب و زیندانلاردا اولدوغو زامان هر زامان کیمی فارس مئدیاسی بو اولایلاری گورمه دن سوکوتونو قورودو ، سعید متین پور ایله بو قونونو دانیشیب و سورونو سایین براهنی ایله پایلاشماغا قرار وئردیک و سعید بو مکتوبو حاضیرلادی آمما بعضی ندنلردن دولایی یاییلمادی سعید بو مکتوبدا سورونوموزون دانیشیق یولو ایله حل اولاجاغی اینانجینی آچیقجا بیان ائدیر و اینسان حاقلاری پوزولماسینا سس سیز قالانلاری قیناییر ....
ایندی ایسه سعید و اونلار باشقا فیکیرداشیمیز زیندانلاردا و یئنه ده فارسلاشمیش مئدیا و سیاست تورکلره قارشی اینسانلیق دیشی معامله یه گوز یوماراق، سوکوتونو قوروماقدادیر و مساله هله ده یئرینده دیر ، اوزه ل لیکله کئچن ایکی ایلین اولایلاری دورومو داهادا آغیرلاتمیشدیر بوندان دولایی بو مکتوبو سایین براهنی نین جاوابینی آلماق اومیدی ایله سعید متین پور و دوستاقدا اولان اونلار فیکیرداشیمیزا تقدیم ائدیره م.
سایین دوکتور رضا براهنی جنابلاری
سالام
بیلدیگینیز کیمی آلتی ایلدیر ، یوز مین لر تورک ، هر ایل تیر آیینین 2 اینجی جوما آخشامی و جوماسی " بذ قالاسی" نا چیخیب و اسکی ایللر قهرمانی " بابک " آدینا تورکون بو گونکو کیملیک سورونونو چئشیدلی یوللار و ایفالار ایله بیان ائدیرلر. دئییلن ایکی گونده تورکلر شعر و موسیقی دیللریله دانیشیرلار. تورک سیمبوللارین جانلاندیریب و کیچیک توپلوم لاردا سورونوموز اوزره بیر- بیرلریله قونوشورلار .
دئملی بو بویوک قورولتای بوتون سوزلری ، آدام لاری و گروپ لاری بیر یئره ییغیب ، تورک و آذربایجان مساله سینی قاباردیب ، ایران و دونیا گوزو اونونده قویور. بئله لیک له بورادا کوتله و آیدین آراسیندا بیرلیک یارانیب و او بیر طرفدن ایسه آیدین لار گوروشوب و گوروش لر آنلاشمالارینا سبب اولور. حرکت و قالایا یوروش ، بو آلتی ایلده دوندان دونا گیرمیش و نهایت بو سون ایکی ایلده یوروش اوزو و بیرلیک هر شئیده ن اونملی و گرکلی حالدا اوزلرینی گوستریب لر. تاسف له بو بیرلیک گئرچک لشن زامان و آیدین لار بیرلشمه گه دوغرو گئده ن زامان و ایراندا هئچ بویوک کوتلوی حرکت اولمایان زامان ، تورکون کوتلوی لشمه گه دوغرو گئده ن حرکتی شیددتله تاپدالانیب و چالیشان لار دوستاق لارا تاپشیریلیب لار.
بو البته میللییت چی تورکلر ایله حوکومتین بیرینجی اوز-اوزه دورماسی دگیل و میللییت چی لر یئنه باجاراجاقلار.
اما بو ایلده گوردوک فارس مئدیاسی ایچریده و ائشیکده گئنه سوکوتا باش قویوب و بئله بویوک بیر اولایدان هئچ بیر خبر یایمادی.
تیر آیینین ایلک گونلرینده ن پولیس واطلاعات ایداره سی سیخینتی لار یاراداراق ، 8 ، 9 و 10 اونجو گونلرده پولیس و سپاه گوجلری ، اهر و کلیبر یوللارین باغلامیشدیرلار . یوللار تکجه بوردا یوخ زنگانداندان و تبریزده ن توتوب ، غربی آذربایجان و اردبیل یوللاری دا باغلانمیش و بوتون بو یوللاردا اتوموبیل لر ساخلانیلیب یولچولارین مقصدی سوروشولوب ، اثاثلاری آختاریلیردی.
او گونلر مینلر اینسانی یولدان قایتاریب و نئچه مین قالایا چاتان میللییت چی نی ده ، مینلر سپاه ، بسیج و پولیس گوجلری باتوم واسیطه سیله دویوب و داشا باسیبلار. مامورلار یوزلر اینسانی دوستاقلاییب و الینده ن گلن چتین لیگی ، قالادا اولانلارا- یاشلارینا باخمایاراق- یارادیبلار.
یئنه تاسف له دئمه لی ییک فارس مئدیاسی بونلارین خبرین و یاییلان راپورتلار و بیانیه لری یایمادی. دئیه ک ایچریده سانسور وار ، ائشیکده نه وار ؟ بو مئدیادا چئشیدلی فیکیرلر و گروپلارین رادیو ، تلویزیون ، وئب صحیفه سی ، درگی و قزئت لری وار آما هامیسی سوکوت ائتدیلر.
نه دن ؟
جناب دوکتور براهنی
سیز عومور بویو فارس دیلینده یارادیب و چئشیدلی ژانرلرده او دیلین ادبیاتی نی زنگین لشدیرمیش سینیز. بو حالدا فارس دیلی آنا دیلیم دئییل دیر ده دئییب و تورک اولدوغونوزو هر زامان آنلاتمیش سینیز.سیزین بیر آیاغینیز فارس دیلینده دیر و بیر آیاغینیز تورپاغیمیزدا. بونون اوچون سیزین له دانیشماغی دوشوندوک .
تورکون و آذربایجانین بو گونکو دورومو بیر تاریخین محصولودور. بو دورومو یاراتماقدا بوتون ایران آدلانان تورپاقدا یاشایان لار رول اویناییب و بودا اولماسا ، گله جک دوروم نئجه اولورسا اونون بوتون اولکه یه ائتگی سی اولاجاق. بونا گوره اولکه ده یاشایان میللت لرین بوگونکو " کیملیک سورونو " ندا بوتون آیدین لارین اشتیراکی گرکدیر .یوخسا ایندی گئده ن آیریلیق لارین سونو هارادا دایاناجاق بللی اولماییب و گله جکده بویوک آیریلیق لار و چتین لیکلر یارانا بیلر.بیز کولتوره ل و اینسانسال حاقلاریمیز اوزره چالیشانلاریق و طبیعی دیر کی اینسانجاسینا یاشاماغیمیز هر سینیردان و قورال دان اونملی و دیرلی دیر.اما ایندی لیکده قارداشلیق پوزماق ایسته مه ییب و کیمسه نین حاققینین باتیرماغینی دا دوشونمه ییریک . کیمسه بیزیم حاققیمیزی تانییرسا قاراداشیمیز و تانیماییرسا دوشمانیمیزدیر.
فارس یوخسا فارسلاشمیش مئدیا صاحیب لرینین بئله سوکوتلا داورانمالاری بیزی دوشوندورور.چوخ زاماندیر چالیشیریق سون سوزوموزو اونلار ایله دانیشاق.
سایین یازیچی
بئله بیر فیکره گلدیک ، سیزین موقع نیزدن فایدالانیب و اونلار ایله دانیشاق . بیزه اینانماییرسالار و بیزی تانیماق ایسته مه ییرسه لر سیزی تانییرلار و دیللرینده یارادیجی لیغینیزی گوروب لر .سیزدن یاخین کیم ؟ بیزه ده اونلارادا.
بیر سورغو اورتایا آتیب اونلارین سوکوت لارینین نده نینی سوروشونوز.
نه دن اوزلرینی ایرانلی سانیب آما ایراندا باش وئره ن بو قدر بویوک سیاسال ، توپلومسال و کولتو ره ل خبرلردن گوز اورتورلر ؟ یالنیز خبر تورکون حاققیندادیر دئیه؟
نئجه اولور هر یئرده اینسان حاقلاری و دمکراسی مودافیعه چی سی اولوب آما بیر تورکچونون دوستاقلانماسی یوخسا شیکنجه سینین خبرینی یایماییرلار؟
نه دن تورک و باشقا ایران میللتلرینین کیملیک سورون لارینی دیله گتیرمه ییب و اونون اوزره آراشدیرماغا چالیشماییرلار؟
سویداشلارینیزین بو خواهیشینی یئرینه یئتیرمک اونلاری سیزه میننت دار ائده جک.
ساغ اولون
تیر 1384
سعید متین پور
