" تاریخ اوتوموبیللرین گوزگوسونه بنزهییر ، سوروجو قاباغا گئتمک ایچین گوزگوده دالییا باخمالیدیر ، گوزگو اولمادان سوروجونون ایشینین زورلاناجاغی بللیدیر."
بیزده تاریخیمیز قونوسوندا بو اوخشاتمایی یاشاماقداییق ، تاریخیمیزی اینجهلهمهدن و تاریخیمیز اوزهرینه ، درین توپلومسال تنقید یاپمادان ایرهلی سورمهمیز چتین اولاجاق.
بو آراشدیرما و تنقیدین بیرینجی سونوجو ، اوزهللیکله یاخین تاریخیمیزده " تورکلوک بیلینجی "نین اولماماسیدیر دئیه دوشونورهم.
19 نجو یوزایللیکده باشلایان میللتلشمه پروسهمیز " تورکلوک بیلینجی "نین یوخلوغوندا اوزگهلرین خئیرینه سونوجلانمیشدیر.
یئنی نسلیمیز 150 ایللیک سورهجدن سونرا ، بو پروسهیی یئنی بیر کیملیکایله باشلاتمیشدیر ، بو اوزون ایللر مدتینده ، آرادا کئچیجی و قیسا دالغالار اورتایا چیخسادا ، سورهجی اصلاح ائتمهده باشاریلی اولمامیشدیر.
بئلهلیکله " میللی بیلینج یا تورکلوک بیلینجی "نین گئنیشلهشمه و درینلشمهسی حرکتیمیزده استراتئژیک اونم داشیماقدادیر. اویانیش آدلاندیردیغیمیز سورهج ایسه بو استراتژینین اونملی پارچاسیدیر.
- یاشادیغیمیز اولکه " ایران " اوزه ل بیر یاپییا مالیکدیر : اوزون استبداد گلنهیی ، یاریمچیلیق و دایاز مدرنیسم ، نفته دایالی اقتیصاد ، چوخ میللتلی ائتنیک یاپیسی و ژئوپولوتیک دورومو ، کئچن 30 ایلده فورمالاشان دین حکومتی و ...ایراندا مرکب دوروم یاراتمیشدیر.
نفت و باشقا گلیر قایناقلارینین دولت الینده اولماسی ، خالقی و گوجسوز سیویل توپلوم اورگوتلرینی ائتگیسیز قیلمیشدیر. آمئریکالی یازار- فرید زکریا – بو دورومو بئله تصویر ائدیر : بو حکومتلر گوج و مالی قایناقلارینی یئر آلتیندان ( نفت ) آلیب و اوزلرینیایسه گویه ( دینی مشروعیت ) باغلادیقلاری ایچین بیر سورون یاشامادان ، یئر اوزونده بولونان خالقی " هئچ "ه سایماغی باشارمیشلار.
یئنی ایلهتیشیم ( ارتباطات ) تئکنولوژیسی ، دینقایناقلی مشروعیتین ضعیفلهمهسی و ایدئولوژیک سورون ، حوکومتین باشاریقسیزلیغی و یایغین فقر ، ایرانین اولوسلار آراسی ایلیشکیلرده پیس دورومو ، اوجالان میللی – دموکراتیک ایستکلرین هارایی ، اورتا طبقهنین گلیشمهسی ..دولاییسییایله حکومت ، خالق ایستکلرینه سایغیلی داورانماغا سوروکلهنمیشدیر.
- کئچن ایللرده یالنیز میللی ایستکلریمیزی قاباردیب و وورغولادیغیمیز دولاییسیایله ، چاغداش اینسانی دهیرلر لازیمجه سیاسی ادبیاتیمیزا یانسیمامیشدیر و دموکراسی ، آزادلیغی بیزه دخلی اولمایان مرکزچی و سراسری حرکتلره عایید اولما یالنیش ذهنیت و آنلاشمامازلیق یارانمیشدیر ، بیزه قارشی اولان بعضی گوجلرایسه بو یالنیشی شیشیردهرک ، حرکتیمیزی عیرقچی ، آشیری میللتچی ، آنتی دموکراسی تانیتماغا چالیشماقدادیرلار.
دئملی پژاک الینده سیلاح توتوب باریش ، دموکراسی و اینسان حاقلاری پروپاقانداسی یاپارکن، کوکدن مدنی و دمکراتیک پرینسیپلی حرکتیمیزی دوزگون ایفاده ائتمکده بیر آز باجاریقسیز اولموشوق.
بونلارا رغما ، حرکتیمیزین دمکراسی ، آزادلیق ، مدرن دهیرلر و انسان حاقلاریایله باغداشماسی بیر گئرچکدیر ، بئله لیکله مدرن اینانجلاریمیز دوغرولتوسوندا ، آزادلیق ، دمکراسی و اینسان حاقلاری حرکتیمیزین آماجیدیر دئیه دوشونورهم. آیریجا دموکراتیک اورتامین بیرینجی استئراتژیک هدفیمیزه (" تورکلوک بیلینجی "نین گئنیشلهمهسی ) اولاشماقدا چوخ یارارلی اولاجاغیدا شبههسیزدیر.
بو اساسدا اوز سیاسی کیملیییمیزی قورویاراق ایرانین دموکراتیکلشمه سورهجینی دستکلهمه حرکتیمیزین ایکینجی اساس استراتژیسی کیمی دیرلنمکدهدیر.
- احمدی نژاد دونمینده تانیق اولدوغوموز سیاسی باسقیلار ، خرداد 85 اولایلاریندا دوولتین بوغوجو توتومو ، معیشت سوییهسینین گئریلهمهسی ، وارلیغیمیزی دیری توتان تورکجه درگیلرین قاپانماسی ، تورک اویرهنجی حرکتینه باسقیلار ، بوتون مدنی و کولتورهل چالیشمالارین یاساق حاله گلمهسی اونوموزدهکی جمهورباشقانلیغی سئچیمینی چوخ اونملی قیلمیشدیر.
- بونلارایله یاناشی بایکوت و تحریم سیاستینین ائتگیسیز اولماسی ، آمریکادا باراک اوبامانین قازانماسی و بو اولایین اولوسلار آراسی ائتگیسی بوتون سیاسی گروهلارین حرکتلهنمهسینه سبب اولموشدور . آذربایجان فعاللاری ایسه بو سئچیملرده آکتیو اولماق ایچین نئچه آی اونجهدن حاضیرلانمایا باشلامیشلار آنجاق و بوتون زحمتلره و عموم فعاللارین ایستهیینه رغما بویوک بیر باشاریقسیزلیق ایله قارشی– قارشییاییق.
ایلک اولاراق کوردیناسیون شوراسینین یارانما قازانجیایله یاناشی ، یئنی آیریلمالارادا میدان آچیلمیشدیر و تاسفله بو دئدی-قودولاردا میللی منافعه دوشونمهیی و سئچیم فرصتینی بیر باشا ایتیرمیش اولموشوق.
تئوریک بوشلوق ، بیرلیک و ائتلاف دوغرولتوسوندا قوللانان عیبهجر مئکانیزم ، شخصی آنلاشمازلیقلار، انحصارچی داورانیشلار ، غلط دموکراسی و بیرلیک آنلاییشی ، سلبی داوراماغا آلیشمیش بئیین و سییاسیت طرزیمیز و تشکیلات تجروبهسیزلیگی بو باشاریقسیزلیغین ندنلریدیر.
منجه بو باشاریقسیزلیق هامیمیزا عایید سوروندور و بیرر- بیرر بو آجی اولایدا سوروملویوق ، هر حالدا و چوخ تاسفله سوزو گئدن تارتیشمالار ، " هئچ " اوزه رینه قورولان ائتلاف و قطبلاشمالار حرکتین گوجلو اورتایا چیخما قابلیتینی یوخا چیخاردی. بو باشاریقسیزلیغی واقتیندا اوزهل اینجهلهییب و گلهجکده دوزگون داورانماغیمیزا لازیم اولان درسلری چیخارمامیز اونملی و ضروری دیر.
- سئچیملره گلدیکده سیرالادیغیم ایکی اساس استراتژییه دایاناراق ، میللی حاقلاریمیزا اینانیب و اونلاری ساوونان ، باغیمسیز ، دمکرات ، گئنل ایستکلری قاپسییان و سورونلاری چوزهبیلهجک پروقراما صاحیب بیر آدای بیرینجی ترجیحیمیز اولابیلردی.
- ایرانین اوزهل دورومو و سئچیملرین دوغرو-دوزگون شرایطدن اوزاقلیغی و سئچیلمه حاققینین بللی آدایلاردا محدود اولماسینی نظره آلاراق باشقا سئچهنکلری دوشونمهمیز گرهکیر.
ایستکلریمیزین تدوین و علنی یاییلماسی ایله یاناشی ، بللی اولچوده میللی حاقلاریمیز و دمکراتیک پرنسیپلره سایغیلی بیر آدایی دستکلهییب و اونون حکومت فیلترلریندن گئچمهسینه گوجلو کمپن یولا سالماق ایکینجی ترجیح اولابیلر.
بو سورهجده الده ائدهجهییمیز قازانجلار آیدیندیر : بئله بیر آدایین کمپینده اولوشان قطبلاشما میللی بیلینجین درینلشمهسینه زمین یاراداجاق ، خالقایله یاخین ایلگی قورماق و بو اورتامدا دمکراتیک و میللی دهیرلریمیزی عموم خالقا چاتدیرماق فرصتینی ده الده ائدهجهییک.
منجه سایین دکتر اعلمی بو کاتاقوریده یئرلشریر و بیرینجی ترجیحین ممکن اولمادیغی حالدا ، بیز بوتون گوجوموزایله اعلمی جبههسینی گوجلهندیرمهیه سوروملویوق و اولدوقجا شورای نگهبان فیلتریندن آشماسینی ساغلایاجاق تدبیرلرهده حاضیرلیغیمیز اولمالیدیر.
اعلمینین کئچمیشی ، رفرمیست کیملییی ، قوللاندیغی سیاسی ادبیات ،سیستمین دئتایللی ضعف و قوتلرینی تانیماسی ، شخصی اوزهللیکلری ، خالق آراسیندا عموما یاخشی و مثبت صفتلرله آدلاندیغی، آذربایجاندان قیراق ایرانین باشقا یئرلرینده تانینماسی و ..... بو ترجیحین گوجلو تحلیله دایاندیغینی اثبات ائدیر.اوستهلیک ایکیلی استراتژیمیزهده تام اویغون بیر سئچهنکدیر.
- بیر آنلامدا چاغیمیز ایدئولوژیلرین چوکمه و بیتمه چاغیدیر ، بئلهلیکله پراگماتیسم ( عمل گرایی ، ایستکلری ممکن قیلماق ) چاغداش توپلومسال حرکتلر و پارتییالارین یول خریطهسینه چئوریلمیشدیر.
رئال بیر تحلیلده میللی آیدهآللار و دمکراتیک ایستکلریمیزه بیردن و آنی چاتمامیزین ممکن اولمادیغی بللی و آچیقدیر بو اورتامدا بیر آددیم ایرهلیلهمهمیزه یول آچا بیلسهک بئله ، فرصتی ایتیرمهمهلیییک .
باشقا دیلایله ، ایدهآللار و ایستکلریمیزی گوز اونونه آلاراق بوتون فرصتلردن یارارلانمالیییق دئمک پراگماتیسمین اساس معناسیدا بودور.
پراگماتیسم آرمانلاری اونودوب یوخسا قیراغا قویماق دئییل و بوتون سیاسی تصمیم و حرکتلریمیزین دوغرولوغو عقلانی مشروعیت و ایکیلی استراتژیمیز اولچوسو ایله توتوشمالیدیر و هر غلط سیاسی حرکتی پراگماتیسم دئیه اونایلاماق دوغرو اولاماز.
ایکینجی بولومده یئنی گلیشمهلری نظرده توتاراق باشقا سئچهنکلری دهیرلندیرمهیه چالیشاجاغام.
